我在2017年9月4日,經我一個認識咗10年嘅朋友介紹咗X俾我識。當日我同佢哋去咗油麻地一間茶餐廳入面傾偈,因為我嗰個識咗10年嘅朋友,知道我有個病(多發性硬化症),同埋知道我啱啱結完婚,要搵錢養老婆同個九個月大嘅女兒,急着要錢,所以佢就介紹咗X俾我認識,話佢可以幫到我。我同X傾咗兩句(我估唔到佢(印度籍)識講中文),佢就問我有冇興趣撈搵錢好快嘅嘢(撈毒)。如果我肯做,佢下次有貨到會叫埋我,因為佢話每次最少都有2至3萬。我當時冇應承佢,淨係話我會諗諗。
去到2017年年9月13日,我呢個識咗10年嘅朋友打咗兩次電話俾我,第二次係半夜,我冇聽。到我起身嘅時候,我打返俾佢,佢就問我今日有咩做,我同佢講我一陣要入醫院做磁力共振,佢就叫我做完搵佢。
我做完MRI之後我就打俾我嗰個10年嘅朋友,佢就問我,你而家做完MRI,一陣仲有啲咩做?我就同佢講冇。佢就問我,上次X同我講嗰啲嘢,我諗成點,同我講話如果我OK,今晚就會做,今次會有5萬。我當時一聽到5萬 ,我就咩都冇諗,即刻同佢講我做,之後佢就話會再打俾我。