我於2021年5月29日，因涉及串謀販運危險藥物被捕，至今已還柙接近四年時間。
喺我16歲時，我認識我前夫因而接觸病毒。當時的我還會抗拒毒品，但我戀愛大過天，自我認為要與他吸毒先可以迎合他的生活。到咗18歲，我有咗BB。我倆當時好好，戒除毒品，迎接我哋第一個愛情結晶品。
到咗BB出世，直到一歲，我倆又因為生活問題而再一次販毒。當時毒品係我前夫負責賣，我只在家中照顧兒子。
到2002年，我前夫因毒品入獄，我當時一無所有，就搵返屋企人告知他們我吸毒。我的家庭係基督教，媽咪好好，為我安排入巴拿巴戒毒村，而兒子交由媽咪照顧。
到2003年，前夫出獄，我亦離開戒毒村。出嚟後，我好快又有咗BB。到2004年誕下女兒，屋企又派到公屋。一家四口原以為好幸福，點知我前夫出面有女人，又多次令我個世界崩潰。
我當時知道前夫出軌過一次，我仍然推住BB車帶個女返教會。點知去到教會，啲教友唱詩歌時，我隻耳完全聽唔到聲。當時我好驚，留低咗個女喺教會，而自己去咗搵我賣毒品朋友吸毒後個人鎮定返。
之後，依件事我係唔敢同人講。我去教會接返個女返屋企，但個人已經好想報復我前夫，我就日頭照顧仔女，同佢哋瞓覺，我就出去玩。基本上晚晚落disco，我要照顧仔女，自己又要消費，唯一可以做嘅係夜晚落disco賣K粉。
直到香港Disco沒落，咁我就賣冰毒。當時從未坐過監，個膽自然好大又唔識驚，直接自己上大陸攞冰毒自己帶過關。
到咗2011年，因毒品被判入戒毒所。到咗2012年出嚟都乖咗一年。都2013年又同朋友因販毒被捕。當時我根本唔覺有問題，因個朋友叫我去收錢，我完全冇諗過嗰啲係毒品，到被捕先知道。
而我今次係因為我同我男朋友需要吸毒而被人利用去操控個𡃁仔販毒。我男朋友係有份正職，而我都有做網絡買賣。
而家我單案都未有日期去判。今次涉及多種毒品，而我嘅刑期係將要面臨10年以上監禁。我自己本身屋企環境小康之家，但我爸爸，媽媽，細妹已經冇探我。我爸媽年紀大，我都唔敢求佢哋探我。
喺還柙呢段日子，我想報讀課程，增值自己，我家人都唔能夠幫助我，我真係唔敢再強求。但喺度真係對人嘅意志一種折磨。由當初我想打呢場官司，到而家接近四年乜嘢意志都消磨晒。我嘅人生已經行咗44年，仲要面對咁長嘅監禁，就係因為唔識選擇朋友，自己心底明知係錯，因為要迎合而跟隨朋友，繼續錯落去，直到而家……
我唔只傷害到自己身體，更加傷害到屋企人，希望我坐完出去父母仍在，依個係我唯一嘅希望，我亦要做返個孝順女兒。
頓然覺醒
我係喺2021年5月29日早上瞓覺中，突然被差人衝入屋拉，完全係唔知發生乜事嘅情況下被叫醒。之後我同男朋友就被戴上手銬。由於我單毒品案涉及一名15歲少年，去到差館啲差人更加係單單打打話我同男朋友「搞細路」。我哋根本唔知依名少年只得15歲。而依名少年係控制我哋販毒老細請返嚟，其實都算係同事。喺差館時，完全係同外界零接觸。
當時係疫情，咁我同男朋友因為咳仲被送去明愛醫院，留醫嗰四日我都係因為入咗院先可以通知媽咪。
到第二日，第一個探我嘅係我兒子。佢問我「點解屋企冇任何毒品，差人都可以拉你」？我當時都唔識點答佢，但自己心底以為只要冇毒品就唔會有事。原來唔係咁……我兒子問我，我會坐幾耐？我就更加唔敢答佢。
我知自己要面對刑期至少10年至12年，而我女兒2021年準備考DSE，佢失去咗我，我好怕影響到佢學業，但好在嘅係我媽咪都好幫我同支持我。而家我女兒都考上科大。呢點我好值得感恩。但最可惜係我唔會有機會去到佢畢業禮。每次去探我都問我幾時可以出到嚟。2026年就係佢嘅畢業禮。我真係萬分後悔。
至於我啲朋友，我開頭一年都仲經常探我，但當我冇晒錢可以再俾佢哋時，就離棄咗我。原來喺毒品嘅世界係唔會有真心朋友。喺依幾年時間，每當夜晚剩下一個人時，我都不停回想點解自己要咁樣。其實我都好想叫屋企人多啲探我，但我真係唔忍心叫佢哋山長水咁嚟探得我15分鐘。我自己而家咁入咗呢啲地方，我真係唔想再比任何麻煩佢哋。
所以喺依度我申請做嘢靠自己買我需要嘅日用品，喺監獄房嘅日子，令我反省明白有時簡單嘅生活已經好幸福。我已經同我屋企人分開咗接近四年時間，喺呢段時間雖然心底好掛住出面，但又唔可以表現到俾啲職員知道。因為太大嘅情緒喜樂都會安排見心理，我好怕自己面對咁多人，所以有時都會選擇沉默。有時只能晚上所有人瞓覺先咁喊，呢啲係咪開「見人歡笑半人愁」？
我而家都經常寫信返屋企，但佢哋從未回過信俾我，但我知道佢哋係有收到，我冇得怪佢哋唔會信，我自己坐監冇嘢多，只有時間最多，但佢哋有佢哋嘅生活，只因自己犯錯未能參與佢哋嘅生活！
面臨漫長刑期
我已經入咗監獄還柙接近四年，到而家都仲未知幾時會有刑期判。而我今次入嚟係因為串謀販運危險藥物。我律師同我講，我將會面對刑期係23年四個月，對我嚟講係我整個人生都完了。
我因為貪圖賺快錢而及所謂嘅朋友利用，以及自己愚蠢，以為只係聽從我上線指示去安排個未成年少年送貨，我係可以置身事外。而事實唔係咁樣，就算自己冇掂毒品，自己真係有做過咁係已經錯誤。
呢個世界上只有屋企係最信得過，而自己因為接觸毒品所以身邊嘅朋友都係吸毒。而喺呢個毒品圈子嘅人基本上都係以利益行先，喺呢段日子我有深深反省自己為乜要因為貪圖賺錢容易，而令自己面對咁多年嘅監禁呢？
我自己本身係做售貨員，因為吸毒而令自己走上呢條不歸路。而家回想返自己係有大好嘅家庭，有仔有女。
我不但失去自由，還令仔女失去母親。雖然以前做售貨員，收入不多，其實只要唔吸毒都已經足夠生活。
喺還柙呢四年，而家回想返先知道生活可以好簡單就已經好幸福。喺未來呢段坐監日子，我會努力增值自己，但求出獄後能夠被社會接納，更新人士真係只求一個機會。我相信自己只要有決心改過遠離啲不良嘅朋友，一定可以做到個更好嘅人。
