喺我仲係BB時期嘅時候，我已經被父母遺棄，調低喺屋企入面，直到阿姨同警察破門而入，將我救起，後來就開始咗我俾人當波送來送去嘅生涯。呢個親戚湊一陣，嗰個親戚湊一陣，冇一個安定居所。
甚至乎細個嘅時候，已經聽好多冷言冷語同埋講我父母嘅種種不是。又話佢哋係吸毒，黑社會，兩個都唔係好人。
後來親戚中會話埋我婆婆，話我婆婆生咗阿媽出嚟賀人去乜，而家仲整多個孫出嚟「佗手掕腳」。記得細個婆婆湊嘅時期係四至八歲，阿公係電影嘅打燈師，所以成日都會一段長時間唔喺屋企。而阿婆係做電視台嘅服裝部做。返工係早上10點至晚上10點。所以幼稚園我已經自己落樓返學搭校車，放學自己返屋企。返到屋企會有婆婆返工前整好嘅食物放喺枱面，呢種生活直到八歲嗰年。因為婆婆將我轉咗手，交咗俾叔婆湊，叔婆住將軍澳，所以連校都轉埋。
之後嘅情況就好少少啦，因為叔婆嗰度有好多仔女，可以教我做功課。但係比較吃力，因為以前一直冇人管教功課，測驗，默書，所以成績一直都好差，而且無心向學。但係一年之後，小學四年級中學期，就入住咗兒童之家，直到中二。
有一日，放咗學返到家舍，就見我婆婆，我公公，仲有一個女人，一個男人。而呢個女人就係我阿媽，個男人就係我後父，話開特別會，係接我走嘅，跟返佢哋住。咁我當然願意啦，咁新鮮。嘩！有阿爸阿媽喎。
結果兩個月之後，我後悔就衰咗，仲要衰單大嘅，佢一衰咗，就冇收入，而且仲比我發現我阿媽仲一直有吸毒。然後，我就連學都無返啦。返咗去跟阿婆住，阿婆個朋友介紹我喺髮型屋做學徒。呢段時間識嘅人越來越多，仲跟埋啲同事去飲酒唱K。後來仲未夠18歲，去埋disco玩。
第一次吸毒，就係朋友嘅朋友俾我嘅，係KK嚟。嘩！食完之後個人乜都唔記得，包括唔開心嘅事。自此之後就成日落disco，唔止食k，仲食埋搖頭丸。當時嘅我，遇上毒品，就好似遇上知音咁，仲為埋一班家庭背景同我差唔多嘅朋友。當時感覺就只係覺得大家背景差唔多，唔會俾人睇唔起嘅感覺。所以，就成日聚埋一齊去玩，去吸毒。最後仲搞到工都冇埋，仲自己搬咗出去同啲朋友住，冇再返過屋企。後來又點呢？搬咗出去，又冇工返，咁都要交租㗎！
就係呢個時候，就有朋友介紹咗個人俾我識，話可以搵快錢，一日至少搵$1000。當時嘅我二話不說就梗係做啦！一日$1000喎。當時嘅我仲係10幾歲，一日$1000對當時嘅我嚟講當然係好可觀嘅收入，做髮型屋學徒一個月都係得嗰$2000-$3000。
點知，原來係做排毒品（汽水）可卡因。一開始第一日，都會有啲驚，但到出糧，第一日已經搵千幾蚊，即刻乜都唔驚啦。真係有糧出，有錢收喎。做兩日，已經多過我打工，冇乜理由唔做啦，係咪先？咁咪一直做落去，直至一個月後俾警察拉咗，被判入未成年嘅戒毒所。
唔好覺得染上毒品係件小事情，唔好以為自己要戒一定戒得到。如果你睇小毒品可以害你一世嘅影響力，呢個行為係極度幼稚，而且十分不智。
由戒毒所出嚟之後，後來有同其他所員聯絡，就又再吸返毒，今次仲厲害，食冰添。原本係戒毒所出嚟有跟返阿婆住過一段時間，結果最後當然係搬走咗啦，因為阿公話我唔做嘢，咁我咪又搬走咗，又幫人做派毒品搵錢，終於派越多份量。梗係啦！份量越多，搵錢錢越多，只有有錢就唔會俾人睇唔起，有錢就唔會有人介意你屋企咩環境，讀書讀到咩學歷。而且，有錢就唔會俾人話自己佗手掕腳，亦都唔會再聽到親戚講啲冷言冷語嘅說話。
但係咁，當然被唔過坐監嘅命運。出出入入都入過四、五次戒毒所，由未成年坐到成年，而且到2022年，今次我仲衰咗1公斤可卡因，被告販運，製毒。
犯罪必須承擔後果
喺呢段被還押嘅期間，係十分無助，因為當我被拉嘅時候，我屋企，就已經被退租，亦未能及時聯絡到朋友幫我返屋企收拾細軟。所以，屋裏面嘅嘢都一件不留地冇晒啦。我嘅衫，褲，鞋，電腦，我養嘅寵物，袋，總之屬於我嘅嘢都失去。
而且我係個無父母冇，冇家人嘅人，入咗嚟呢度，一開始我係冇人探訪嘅，冇錯！係連洗頭水咁簡單嘅嘢都冇人入到俾我。當晚上嘅時候，瞓覺嗰陣，都會諗到底自己為咗嗰少少錯入嚟坐監係咪真係值得呢？搞到一無所有，亦都有好多嘢顧慮，怕自己第時出冊嘅時候，世界已經變到自己乜都唔識。
之前自己仲睇新聞話以前有個轟動一時嘅殺人犯出監，見到佢搭地鐵都好新奇，估唔到而家呢個主角會係我自己。
啱啱聽收音機，知道九龍灣展覽中心都落幕……有人仲可以去打吓卡，影吓相，留個臉，如果我唔係凡事入咗嚟，相信我都會係打卡一份子。不過而家咁，都冇辦法啦。坐監就係失去自由。喺呢度入面，行住坐臥都俾人監視，周圍都總有CCTV及到實，連瞓覺都俾人影到㗎 ！試問呢種生活點樣唔感到有壓力？簡直係智力正常嘅人都絕對一定唔會想過呢啲生活！
呢度電話都冇得俾你隨時打，有冇上網，有冇冷氣，同生活喺古代真係冇分別。最重要係呢度冬天又凍過人，熱天又熱過人。夏天成身生晒粒粒，又痕又痛，因為呢度真係好焗，成身汗基本上啲粒粒會好難好，仲會嚴重啲添。總之坐監唔係你想像到嘅生活，至少唔係你想點就點。基本上，一日嘅時間表，你要做啲咩都已經俾人安排好晒不特止，仲係你冇可能拒絕，因為凡事，你管好自己，就唯有坐監等懲教署人員嚟監管你。
而且坐監，係件十分痛苦嘅事。點解？呢度唔止熱又焗咁簡單，呢度超多蚊，又多嘢咬，好多昆蟲，又多曱甴。雖然呢度有探訪時間，不過15分鐘，其實又可以講到幾多嘢？辛苦自己都算，仲要辛苦埋朋友或者家人要佢哋嚟同你見15分鐘，又搭車又轉車咁麻煩，到底為咩呢？有得比我再揀過，我當然唔會犯事坐監啦。見過鬼怕黑。如果我仲有家人，我知道佢哋一定都唔希望我過呢種坐監嘅生活。
唔好覺得染上毒品係件小事情，唔好以為自己要戒一定戒得到。如果你睇小毒品可以害你一世嘅影響力，呢個行為係極度幼稚，而且十分不智。到你衰咗一次之後再回望返轉頭，到時可能一切已經太遲。就好似我咁，想當初，我都覺得電視廣告，收音機電台，海報叫人唔好掂毒品，一直衰硬，我都覺得：「車！有冇講到咁大鑊啊？」而且，當時我仲覺得政府搞咁多宣傳禁毒好似多此一舉。而家，我諗返轉頭，真係一啲都唔誇張。因為毒品，你掂得，好自然你就會透過吸毒嘅人再認識到相關販賣毒品嘅人。到時唔止自己吸毒咁簡單，仲會販賣埋毒品。害自己，仲害更多無數嘅人。自己坐監，仲害埋其他人。因為食毒品，後來又販賣埋毒品，可能仲會傷害埋人哋都因為淪為獨反而俾人拉。
如果形容毒品為魔鬼，真係十分貼切。而且希望大家唔好為咗一時嘅利益而犯罪，因為得到嗰一時嘅利益而後悔終身，真係件好唔明智嘅選擇。
仲有，千祈唔好人叫你試吓毒品，你就去試，唔好覺得是少少唔怕。想當初我都係咁就犯下大錯。我而家即將要面臨嘅監禁，法官判落嚟大約係25年，扣減三份一，都要坐10幾年。
如果我當初冇誤交損友，是第一啖毒品，如果唔係因為試咗第一啖毒品，又貪心去搵快錢……我諗我今時今日都唔需要落到如此境地，10幾年啦！人生有幾多個10幾年啊？ 10幾年光陰坐監過，真係好浪費。
點解又自由唔選擇，雖然一個月返工好辛苦，出糧亦不及搵快錢多，但係至少做一個正常人。返工放工，係錢搵少啲啫，至少唔使坐監咁難捱，浪費光陰……辛苦自己。
今次，我真真正正知錯，知道生命滿希望，前路由我創。出返去之後，我會好好做人，立定決心，腳踏實地搵份正職做。就算辛苦我都會捱落去，我會記住自己呢段坐監嘅非人生活。
希望大家如果有緣睇到我呢篇信，千祈唔好犯法，做任何事都一定要三思，唔好俾機會自己坐監。因為坐監呢件事一啲都唔有趣，唔好玩，仲會後悔一生。
