我係2022年12月13日，因販運危險，藥物喺深水埗被捕。我記得2022年初，我仲係一個貨車司機，每日工作15至17個鐘，靠每月大概三萬蚊左右嘅收入去照顧家中已退休嘅父母及應付各樣開支，生活並不容易。
直至童年四月，辛勤大半生嘅父親健康狀況急轉直下，經常出入醫院。直至六月確診末期前列腺癌同四期肺癌。曾任職保險嘅我即刻意識到將要應付一大筆開支。
一次同同事傾訴期間，佢話有辦法，但一解決問題就要即刻收手，然後介紹咗我俾一個毒販。考慮咗幾日之後，我始終敵唔過一個可月入近廿萬嘅引誘，決定行咗呢條路。用自身前途去換取呢份收入，尤其係之後醫生話要每個月大概要13至18萬買鏢靶藥為父親治療，而療程起碼要一年時間嘅一刻，我更覺得我應該咁做。我父親係將大半生時間投身工作，為嘅就係家人生活無憂嘅傳統大男人，亦因為咁至少同我最少利多，加上我成年後亦冇為家人做過啲乜，令我覺得我更應該為佢做返啲嘢。
我開始疑神疑鬼，唔敢信任其他人，驚自己衝口而出講錯嘢就會報警。
販毒嘅生涯並唔容易。每晚開工都要左閃右避，隨時失手就有開工無收工。亦冇面目面對家人，朋友，唔夠膽比佢哋知我做緊啲乜嘢工。更甚開始疑神疑鬼，唔敢信任其他人，驚自己衝口而出講錯嘢就會報警。
結果，我喺半年後嘅一晚被捕，老實講被捕一刻我送咗一口氣，終於可以結束呢種每日精神緊張提心吊膽嘅生活。同時亦憂慮之後父親嘅療程同費用點算…… 被捕後，法庭拒絕我嘅保釋申請，我亦於荔枝角收押所迎接最差嘅結局。2023年1月，我父親北極癌病，搶救無效，冇家人陪同嘅情況下與世長辭。
現實來襲
坐監並唔好受，因為坐監並唔係為咗享受，喺監倉係冇自由、冇私隱甚至冇尊嚴。並冇誇張。全部都係親身經歷。
首先，你會失去行動嘅自由，真真正正嘅身不由己，在冇得自己決定幾點瞓，幾點起身，去邊度食啲乜，去邊玩啲乜，同邊個去邊做啲乜嘢，甚至你想幾點沖涼都冇得你揀，全部都會由懲教署編排一大班人同時進行。只要時間一到，你唔想做都要做，例如你唔做運動嘅都要一齊去球場。身體唔舒服或失眠想瞓多一陣都唔可以，或者病咗，例如：喉嚨發炎，傷風，感冒，都要星期一至五特定時間先有得睇醫生。
坐監係冇私隱㗎，你會二十四小時身處被監控嘅環境，監控你嘅有CCTV啦，懲教署職員，同埋一齊生活嘅所員，當然你認為自己係監控其他人嗰個，可能會好瘦啲嘅。點樣無私隱呢？首先，瞓你唔會一個人瞓，無論對方你鍾唔鍾意，有冇偈傾，你都要接受。你所有嘅書信都會有保安檢查。你接收到嘅資訊同物品都係，即係話你寫嘅信，第一個睇嘅絕對唔係收信嗰位。同樣你收嘅信都係。雖然保安人員都唔係好想睇你同老婆嘅肉麻嘢。沖涼就好些少，冇咗CCTV，不過就起碼40至50人同時沖，真係你背脊有幾多粒墨，紋身問咗啲乜，鑲咗幾多粒珠，大家都一清二楚。甚至你夜晚偷偷地喺被入面靜靜雞喊，第二日都會全部人都知，更加唔好話一是諗唔開想自殺，保證失敗。
講義氣講到斷氣嘅所謂大佬老表，只係想見佢哋一面傾偈句都唔肯嚟，最後都只能講句粗口，慨嘆人走茶涼。
咁點解唔尊嚴呢？我比較幸運，不過我親眼見到好多用盡各種方法，去乞求出面嘅家人至親，愛人妻兒，甚至講到患難與共有今生無來世嘅王子兄弟，講義氣講到斷氣嘅所謂大佬老表，只係想見佢哋一面傾偈句都唔肯嚟，最後都只能講句粗口，慨嘆人走茶涼。
雖然係一大班人共同生活，但嗰種孤獨寂寞嘅感覺就只有試過嘅先知。大家都知對方唔係想同自己呻，只係大家都唔篤穿呢個事實。原因係冇得揀。監獄永遠都係最多人強顏歡笑嘅地方。
反思
有好多人都覺得販毒，無論係販運定係販賣都係可能好輕易，好快速咁搵到一大筆錢。可以同你講呢個諗法係錯㗎，因為「上得山多終遇虎」，你做耐咗都總會因為習慣咗，麻木咗而掉以輕心，然後失手或者被人舉報。更何況「花無百日紅」，呢樣嘢絕對唔能夠成為你嘅終身職業，與其冒險，不如趁後生嘅時間做好風險管理，搵一份正當職業，然後買幾份保險，有病就醫病，冇病當儲錢咪仲好。與其埋怨強積金蝕咗你啲血汗錢，不如好好地揀間好嘅強積金所托公司，好好地管理自己嘅強積金戶口，用時間去攤分風險，總好過好似我咁臨急臨忙走去用前途去換呢啲錢。
無論係乜嘢年紀，呢條路永遠都唔應該揀。你後生嘅大把時間，你唔後生嘅，衰咗坐完監之後你冇乜時間，除非你有方法買時間就去啦。如果你冇方法用錢買時間，同時你覺得嗰啲錢足夠令你犧牲前途，愛人，朋友，同佢哋相處嘅寶貴時間，見證仲要一刻嘅機會，錢俾你所失去嘅一切都更重要嘅話，你可以唔使理我講嘅嘢。如果唔係嘅，就停一停，諗一諗，辦法總比困難多呀。
每一個決定都足以影響一生，特別係錯誤嘅決定，受影響嘅隨時唔止你自己一個。
每一個決定都足以影響一生，特別係錯誤嘅決定，受影響嘅隨時唔止你自己一個，好似我咁，我嘅家人，愛人，朋友都因為我而受影響，好彩嘅係神俾咗機會我，喺我未坐到不可挽回嘅時間，透過警察同懲教制止咗我，仲比一個機會我冷靜同重新整理自己往後要行嘅路，重新做一個可以喺太陽底下，光明正大生活嘅人。希望可以有機會照顧年事已高嘅媽媽，堂堂正正咁面對家人，朋友。
