Hello，今日收到你哋寄嚟嘅信了！感謝你哋俾機會我參加禁毒計劃，我都希望我嘅故事可以令人避免好似我咁因為一時嘅貪心而導致失去自由，以下係我嘅故事。
喺我18歲嘅時候，已經因為販毒而坐咗九個月監。幸好當時有我嘅屋企人同女朋友一直對我不離不棄，令我嗰段時間雖然冇自由，但都過得比好多人幸福。重獲自由之後，我決定腳踏實地，唔再因為賺快錢而令佢哋傷心失望！
直到2018年，我參加一個朋友嘅酒吧聚會嘅時候，重遇我上次坐監嘅囚友N哥，佢以前喺獄中都好照顧我，我哋就交換咗電話，話下次再一齊飲酒。之後佢就成日約我飲酒，每次佢都叫一大班人之後佢埋單，我叫埋我啲朋友去佢都一樣埋單。咁飲咗幾次酒之後，我就問佢點解可以日日飲酒唔使返工，仲有咁多錢使。佢話佢係賣毒品。我問佢唔驚坐監咩？佢話唔驚，因為佢永遠都唔會自己掂，只會叫人送貨。之後佢問我有冇興趣幫佢手，我都係拒絕咗。我唔敢再做，我驚要坐監。
去到2018年尾，我同N哥都重遇咗半年。雖然我唔幫佢派毒品，但佢一直都對我好好。我當時仲認為同一個賣毒品嘅黑社會做朋友冇問題，只要我自己唔幫佢派就OK！
跟住有一日，佢話有個夥計唔知去咗邊搵唔到，有一批貨已經喺外國寄咗嚟香港。如果一直唔拎可能會俾人發現，沒收個郵包，咁佢會損失幾百萬。當時我都唔想佢損失咁多，但我真係唔敢去幫佢拎，所以我又拒絕咗佢。
S仔又搵到錢還錢，又幫到N哥，我仲可以多$10,000用，咩都唔使做，諗得好美好。
隔咗一陣，佢又搵返我，問我有冇朋友可以幫佢拎，我淨係幫佢聯絡簽收嗰個人，教佢要點做，總之就幫佢傳話，好似佢咁唔掂，又點會出事，又話咁樣寄郵包係好安全，成功過好多次！咁我諗諗吓都可以嘅！反正自己又唔使接觸，我就同佢講試吓幫佢搵（人）啦！佢就話搵到嘅話，做嘢嗰個收$30,000，額外再俾$10,000我，見我咁幫佢。
之後我就搵咗一個17歲，又係飲酒識嘅叫S仔嘅人去做。搵佢嘅原因係我之前成日俾佢問我有冇快錢搵，佢話佢賭輸錢，欠好多朋友錢，佢問我嘅原因係因為知我識N哥。我以前唔介紹俾佢做，係唔想佢有一日要坐監。今次又係臨時做一次，佢又搵到錢還錢，又幫到N哥，我仲可以多$10,000用，咩都唔使做，諗得好美好。
最後S仔一收個郵包就俾人拉咗，仲話我叫佢做。過咗幾個月，2019年中就拉咗我，俾我擔保。到2020年頭取消我擔保，還押至今已經三年有多了，被控「串謀販運危險藥物」， 1,000 g「K仔」，以上就係我嘅故事了。
