你好，初次寫信俾你，希望能夠透過書信同你多加認識！
我先自我介紹一下自己先，我係因為販運危險藥物而被還押。我在懲教所已有一年半嘅時間，現在繼續還押在東頭懲教所。喺呢一年時間裏面，我經歷、面對咗好多嘢，由有後無，由當初唔敢面對自己爸爸直到上月先肯俾佢入來探我。係呢段日子我真係好似過山車咁大起大落，自從見番爸爸之後，我好似放低咗塊大石，但之後又收到一連串嘅壞訊息。女朋友嘅離開令到我心情由天堂立刻返回地獄，之後再由爸爸口中知道嫲嫲因意外令到雙腳行唔到，好多好多壞消息都喺短短一個月內收到。我好怪自己點解我咩都做唔到，好自責。如果我喺出面，我嫲嫲係咪唔會發生意外，如果我喺出面，女朋友係咪唔會離我而去。好多問題有時令到自己好迷惘。
我好細個嘅時候已經打工，由細到大都係由嫲嫲帶大我！所以當佢有事我真係好擔心，我爸媽喺我好細個（時）已經離婚，亦都因為毒品而出、入過監房，直到中學先叫見返多（啲）媽媽、爸爸。
喺呢段鐵窗生涯其實有時諗返起都係一件好事，可以用呢段時間去潔淨自己，去重啓自己，重新開始。當然宜家好想快點出去照顧我嫲嫲！
今日係父親節，先祝天下間所有父親節快樂。
先講返我少少背景先，我好細個就出來工作（part-time）維持自己嘅生活。因為由細到大都唔係由爸媽照顧我，直到我中學都係由親戚照顧下生活，去到中三就出來兼職工作。成年後就自己搬出來住，喺工作嘅地方認識到一位「古惑仔」。其後佢因某些原因去咗赤柱坐監。佢出來後搵我，問我有冇興趣想搵錢。因疫情問題，加上公司炒人，冇工作做。之後就應承佢，做第一日就俾人拉咗，本身做完一日就諗住唔再做，因為真係過唔到自己，好擔心，點知就衰咗。
呢筆收入後面，你又知唔知影響緊啲咩，好多家庭都因為有家庭成員服用毒品而令到自己婚姻、子女、住屋出現破碎。大家要行動前思前想後，去諗諗自己，親人及會影響你身邊所有事。
被還押第一個月，心情好難形容，第一個月每晚都諗好多嘢，每一晚都瞓唔着。仲天真到諗係咪仲有一年半年時間走（得）呢。但現實原來唔係，當場精神崩潰，真係冇諗過原來要坐咁多年。其實入來第一個月真係知道自己行錯，入來之後真係錯過好多嘢，亦都令好多人傷心，傷害自己之外，仲冇咗另一半，我失去咗好多好多。
今日睇新聞，都發現好多關於毒品的大大小小案件：吸食、販賣、藏有。其實，每樣都會對自身造成一定嘅害處。我會用我角度去對大家講吓以上嘅問題。
我生長喺一個毒品家庭，喺我仲係小學生嘅時候就親眼目睹屋企人吸食毒品。雖然我唔清楚係咩，但係細細個就知係一樣唔好嘅嘢。今年我30歲，總算知道毒品是什麼！
其實大家有冇諗過服食完對身體有咩好處？我自己思考咗10分鐘都諗唔到有咩任何得益及好處。毒品係一種由化學材料混合出來的物體或結晶品，你可以話係一種藥物，呢種藥物係唔會救到人，亦都唔會有醫病嘅作用。頭痛要食止痛藥，傷風都食傷風素，每隻藥都要對應相對嘅疾病，當然亦都要由醫生處方，先可以進食。大家有冇諗過「K仔」，「汽水」等等……又可以醫到咩病呢？或者大家又諗諗呢種所謂藥物可以用喺咩用途？
至於去唔合法地賣（販運）唔好以為無問題。其實問題仲分分鐘大過你自己吸食。在於法律層面而言，自己吸食或藏有同販賣／販運的定罪罰則真係天淵之別，係你意想唔到咁大。在於個人立場來講，冇錯，你可能會快搵到一筆好龐大嘅收入，但係呢筆收入後面，你又知唔知影響緊啲咩，好多家庭都因為有家庭成員服用毒品而令到自己婚姻、子女、住屋出現破碎。因為毒品要用龐大嘅金錢去滿足自己，甚至用奶粉錢、置業嘅首期去滿足自己，令到自己或親人有財困危機。子女亦都會去到青春期，就會跟着佢嘅父母「有樣學樣」。仲係15、16歲的年青人未能夠自給自足，所以佢會諗辦法得到金錢去購買毒品。例如：問屋企人借，問財務公司借，甚至嚴重到去搶去滿足自己嘅私慾。最後除咗令到自己之餘，仲會令到屋企人出現問題。同大家分享（一）個真實例子。我喺之前見過一位女士，她每日都會搵我，每次她都會推住架BB車來，但後來我再冇見過佢推住BB車來見我，你哋又自己諗吓嗰位媽媽真係能夠養大一個BB？講到這裏，希望大家明白「這樣東西」會令到好多問題發生，這件事係對人「百害而無一利」，大家要行動前思前想後，去諗諗自己，親人及會影響你身邊所有事。
《不需思 不需試 不需破 沒有錯》
希望大家去諗清楚。
